Forslaget vart fremma 22. oktober av Terje Kollbotn, vararepresentant for Raudt i Energi- og miljøkomiteen på Stortinget. 

– Målet er å leggje grunnlaget for å ta attende nasjonal styring over kraftpolitikken gjennom konkrete endringar i energilova, og samstundes gjere opp med konsekvensane av EUs tredje energimarknadspakke, seier Kollbotn om forslaget i ei pressemelding. 

– Hovudbodskapen i forslaget er enkel: Dersom Noreg skal få attende demokratisk kontroll over krafta, må vi ta i bruk verkemiddel som enno ikkje har vore prøvde. Difor føreslår Raudt at regjeringa tek i bruk vernetiltaket i EØS-avtalen artikkel 112. 

Artikkel 112 gir høve til å setje i verk tiltak når ein står overfor alvorlege økonomiske, samfunnsmessige eller miljømessige problem. 

– Raudt meiner at kraftkrisa, dei høge straumprisane, rekordeksport av kraft i 2025, låg fyllingsgrad og den svekka politiske styringa av kraftressursane våre gjer at vi er i ein slik situasjon no. 

Fleire forslag om kontroll på krafta

Forslaget frå Raudt kjem etter at Senterpartiet tidlegare i oktober fremma forslag om at «Stortinget ber regjeringen kraftig redusere strømeksporten grunnet strømsituasjonen i Norge». Energipolitisk talsperson Maren Grøthe i Senterpartiet grunna forslaget med rekordlav fyllingsgrad i vassmagasina og høge og uføreseielege straumprisar.

– Vi mener det nå må tas politiske grep som sikrer nasjonal kontroll over strømeksporten, sa Maren Grøthe til NTB.

Forslaget frå Senterpartiet vart votert over og vart ikkje vedteke. 

Vil løfte kraftdebatten

Kollbotn oppfordrar til å bruke forslaget i den vidare kraftdebatten. 

– Målet med dette forslaget er å invitere alle partia og alle representantar både i energi- og miljøkomiteen og i resten av Stortinget og elles i samfunnsdebatten i Norge til å løfte fram og løyse dei store utfordringane vi i dag opplever på kraftsektoren før det er for seint.