522 nye medlemmer i vervekampanjen!

Nei til EU klarte å nå den målsetjinga som organisasjonen sette seg om å verve 500 nye medlemer i løpet av kampanjevekene 20. april til 4. mai. 

– Når vi har registrert dei siste innkomne vervingane, så landa vi på heile 522 nye medlemer i løpet av dei to kampanjevekene vi no er ferdige med. Dette er svært bra og noko vi alle kan vere stolte over.  Det er første gongen på fleire år at vi har nådd målsetjinga som er sett for kampanjevekene, slår Holdal fast. 

– Medlemsvervinga som er gjort er ein kombinasjon av verving frå ringelister, og vervingar via sosiale media. Det er verving frå ringelister som har gitt flest medlemer.

Hordaland beste vervelag

Hordaland er eit av dei fylkeslaga som sjølv har verva frå ringelistene, og som gjennom heile kampanjen har vore i topp på denne lista over vervingar i fylka. 

– Når vi no summerer opp kampanjen, så tronar dei i toppen, seier Holdal. 

Andre fylke som har vervet sjølv frå listene er Hedmark, Aust-Agder, Vest-Agder og Rogaland. I Finnmark og Nordland har det vore ein kombinasjon av å verve sjølv og å bruke den sentrale vervaren.  I tillegg er det ein del enkeltmedlemer som har bidrege til vervinga.

Den videre plasseringa ser slik ut: Vestfold 30, Akershus 26, Oppland 26, Sør-Trøndelag 26, Nord-Trøndelag 25, Rogaland 21, Møre og Romsdal 19, Oslo 16, Østfold 16, Telemark 15, Sogn og Fjordane 14, Vest-Agder 11, Troms 10 og Aust-Agder 8.

I denne kampanjen viste ringevervinga seg å gi fantastisk gode resultat. 

– Vi må gje ros til Magnus Westbye, som vi hadde engasjert som ringeverver. Av de 522 nye medlemene så har han vervet heile 236. 

Vervekampanjen var planlagt og førebudd i lang tid, men på grunn av smittefaren måtte opplegget endrast på kort varsel. Heldigvis var hovuddelane av kampanjen fullt mogleg å gjennomføre. Verving på sosiale media og ved hjelp av telefonverving kunne gjennomførast som planlagt. Standsverving var ikkje mogleg, og materiell som var planlagt til det, blei kansellert. 

På førehand blei det produsert seks videoar og mykje anna innhald til posting på Facebook og Instagram. Vi planlagde daglege postar på Facebook og Instagram gjennom heile kampanjen. Lenke til innmeldingssida gjekk igjen i alt vi la ut i kampanjevekene.

Vervinga held fram!

Kampanjevekene er over for denne gongen, men det betyr ikkje at det er slutt på vervearbeidet. 

– Sjølv om kampanjen er over, så må de fortsette vervearbeidet. Neste etappe er å nå målsetjinga som er sett for hele året, avsluttar Holdal.

Stort bilde i toppen: Marte Gjestvang Olimb og resten av staben pakkar 600 velkomstpakkar til nye medlemer. (Foto: Eivind Formoe)