Fylkesstyret etablerte ei aksjonsgruppe tidleg i året, gruppa er sett saman av leiar i Bergen NtEU, Tor Sander, og arbeidsutvalet (AU) i fylkesstyret, Jane Nordlund, Sigmund Simmenes og Toril Mongstad. Me utarbeidde ein aksjonsplan som vart presentert og godkjent av styret, og etter det var det berre å gå i gang.

Det har vore møte og stand mange stader i fylket. Her kan nemnast Bergen sentrum, Knarvik i Alver kommune, Husnes, Odda, Voss, Askøy, Etne. Ekstra gledeleg er det at dette resulterte i revitalisering av lokallag i indre Hardanger, der den samanslåtte kommunen Ullensvang skipa lokallag for dei tre tidlegare kommunane Jondal, Odda og Ullensvang. Me har takka ja til å halda foredrag om kampsakene våre hos ulike politiske parti, og me har arrangert medlemsmøte fleire stader. Det har og vore postkasseutdeling av eigen-produserte løpesetlar. I vår hadde med fleire studiekveldar.

Me hadde det årlege årsmøteseminaret i mars i samband med årsmøtet vårt. Dette har vorte ein god tradisjon.

I byrjinga av august deltok AU på Etnemarknaden som gjekk over 3 heile dagar. Det vart og arrangert Motvind-festival i Etne då me var der, og Toril Mongstad held appell på denne festivalen. Me vart og intervjua av lokalavisa Grannar i Etne. Alt dette gjev oss stor moglegheit til å snakka om sakene våre og, ikkje minst, spreia informasjon og driva kunnskapsformidling. Inntrykket vårt er at det trengs i stor monn.

13. august arrangerer me seminar med politisk debatt. Me har to innleiarar, og denne gongen er det ein frå ja-sida og ein frå nei-sida. Me trur at dette vil gje folk eit betre grunnlag for å ta standpunkt. I den politisk debatten, stiller dei 9 partia som er representerte på Stortinget med kvar sin kandidat.

Framover vert det auka standsaktivitet, det er planlagt 6-8 stand, hovudsakleg i Alver og Bergen kommune, og meir utdeling av informasjonsmateriell i postkassar. Datoar for stand vil verta lagt ut på heimesida.

Me oppmodar medlemene våre til å delta på desse aktivitetane, og å koma innom oss når me står på stand. Men dette gjeld ikkje berre våre eigne, vel så viktig er det å prøva å overtyda tvilarane. Me oppmodar sjølvsagt til medlemskap i organisasjonen når me snakkar med folk. 

Avslutningsvis oppmodar me alle til å setja seg godt inn i dei ulike partiprogramma. Sjå kven som støtter oss i kampen mot EU-medlemskap og for å få erstatta EØS-avtalen med ein normal handelsavtale der overnasjonal politisk styring ikkje inngår som eit vilkår for å handla. La oss stå saman for å ta vare på folkestyret og sjølvråderetten, og samstundes vera opne for godt samarbeid på tvers av landegrensene.

GODT VAL!