ARBEIDSPLAN HORDALAND NEI TIL EU

INNLEIING 

Medlemskapsdebatten og ikkje minst ordskiftet om EØS-avtalen har teke seg opp det siste året, både på grunn av dei ustabile straumprisane, men også på grunn av ustabile, internasjonale tilhøve generelt. Enkelte parti tar til orde for at me må ha ein ny debatt om medlemskap i Europaunionen, andre meiner at det ikkje er aktuelt. EØS-avtalen sine mange og inngripande direktiv og forordningar har ført til ei større merksemd om avtalen sine ulemper. Manglande nasjonal kontroll på energiområdet og høge straumprisar har også ført til ein skarpare tone frå fagrørsla mot avtalen. Det same gjeld ESA (overvakingsorganet til EFTA) sitt kritiske syn på norske seriøsitetskrav i arbeidslivet. Ja-sida, og diverre også somme på Nei-sida hevdar at EØS-avtalen har tent oss godt. Desse haldningane skuldast etter Nei til EU sitt syn manglande kunnskap om dei negative konsekvensane av avtalen, og ja-sida sin myte om at avtalen er nødvendig for å få seld varene våre til EU. 

Nei til EU sitt tap i ACER-saka i Høgsterett i 2023 skal ikkje hindra oss i å føra kampen vidare også i 2025/26, då innhaldet i saka er minst like aktuell no. Fleire direktiv på viktige samfunnsområde som vatn, avlaup, bygningsmasse, energi, klima m fl, vil ha stor påverknad på nasjonal sjølvråderett om dei vert innførte. Mange av dei vil også ha stor innverknad på økonomien, både nasjonalt, lokalt og for innbyggjarar flest. Det er ingen grunn til å tru at noverande Storting vil endra praksis når det gjeld innføring av EØS-relevante lover, direktiv og forordningar. Difor er det viktig å påverka årets stortingsval til å få vald inn eit fleirtal av representantar som seier Nei til EU.

Talet på medlemer i Nei til EU har gått ned dei siste åra både nasjonalt og for mange fylke. Samstundes går gjennomsnittsalderen på medlemene opp. Det store spørsmålet er korleis me kan gjera organisasjonen vår interessant og relevant for yngre folk. 

Meiningsmålingar viser framleis fleirtal mot norsk medlemskap i Europaunionen, med EØS-avtalen er det motsett, særleg under dei politiske usikre tidene me har no. Dette er ei utfordring styret vil ta på alvor, og styret vil arbeida aktivt med informasjons- og kunnskapsarbeid. Med dette som bakgrunn vil fylkesstyret leggja fram ein arbeidsplan som rettar merksemda særleg mot informasjonsarbeid og kunnskapsformidling. Dette gjeld både medlemskapsmotstanden og i aukande grad arbeidet med å få erstatta EØS-avtalen med ein rein handelsavtale. Difor vil me og styrka arbeidet med å aktivisera folk i heile Hordaland ved å ha tettare kontakt med lokalkontaktar. Dersom aktive medlemer i kommunane ønskjer å etablera lokallag, vil fylkesstyret gjera det dei kan for å få det til.

HOVUDMÅL 

• Driva aktivt informasjonsarbeid og kunnskapsformidling om kampsakene våre
• Aktivisera heile fylket gjennom betra og hyppigare kontakt med lokalkontaktar
• Vera meir synlege i heile fylket på ulike arrangement som stand, folkemøte m.m.
• Søkja samarbeidspartar i kampen mot EU-medlemskap og for å få fram at det finst alternativ til EØS-avtalen
• Auka aktiviteten på heimesida og på andre sosiale media
• Delta i oppfylling av Nei til EU sin overordna arbeidsplan 
• Bidra til aktivt og målretta styrearbeid samt utvikling av organisasjonen i heile fylket 
• Delta i auka samarbeid på tvers av alle fylkeslaga for inspirasjon, engasjement og erfaringsutveksling. 
• Driva aktiv og kontinuerleg medlemspleie som inneber både vervearbeid og kontingentpurring.
• Gjennomføra ulike aktivitetar i valkampen 2025 for å få fleirtal av unionsmotstandarar i Stortinget 

Utdjuping av måla: 

Driva aktivt informasjonsarbeid og kunnskapsformidling om kampsakene våre

• Arrangera to til tre seminar i året om aktuelle tema
• Arrangera studiekveldar vår og haust
• Stå på stand 
• Formidla kunnskap via heimesida og sosiale media

Aktivisera i heile fylket gjennom betra og hyppigare kontakt med lokalkontaktar

• Halda fram med arbeidet retta mot lokalkontaktane for å engasjera breiare for kampsakene våre. 
• Invitera og involvera lokalkontaktane til lokale og sentrale aktivitetar 
• Arbeida for oppretting av lokallag i kommunar der det lokale medlemer ønskjer det

Vera meir synlege i heile fylket på ulike arrangement som stand og folkemøte

• Arrangera aktivitetar saman med lokallaga og lokalkontaktane fleire stader i fylket: Bergen, Alver, Ullensvang, Odda og Etne
• Delta på lokale og relevante aktivitetar arrangert av andre enn Nei til EU

Søkja samarbeidspartar i kampen mot EU-medlemskap og for å få fram at det finst alternativ til EØS-avtalen. 

• Halda fram med og vidareutvikla kontakten med fagrørsla som viktig alliansepart 
• Utvikla kontakten med dei partia som vil erstatta EØS-avtalen og som tar eit klårt standpunkt mot norsk medlemskap i EU 
• Delta i arrangement som 8. mars, 1. mai og andre aktuelle møte og demonstrasjonar / markeringar som har relevans for Nei til EU og EØS-saka
• Etablera eit tettare samarbeid med ungdom, både i UmEU, Studentar mot EU og andre lag og organisasjonar for ungdomar. 
• Driva kunnskapsformidling om alternativa til EØS-avtalen som eigen handelsavtale frå 1973 og bilaterale avtalar EU har med andre land. 

Auka aktiviteten på heimesida og på andre sosiale media

• Leggja endå meir aktuell informasjon og relevant kunnskapsstoff på heimesida
• Bruka sosiale media i større omfang enn tidlegare
• Spreia informasjon om eiga heimeside og heimesida til Nei til EU sentralt og oppmoda til auka bruk av desse

Delta i oppfylling av Nei til EU sin landsmøte-vedtekne overordna arbeidsplan 

• Tilpassa aktivitetar lokalt til organisasjonens overordna mål, delmål og tiltak 
• Bidra til at organisasjonen når sine overordna mål både nasjonalt og lokalt

Bidra til aktivt og målretta styrearbeid samt utvikling av organisasjonen i heile fylket

• Styret skal halda seg oppdatert om føringar frå Nei til EU sentralt, og følgja opp der dette er naturleg på fylkes- og lokallags-nivå 
• Styret skal vera representert på fylkesleiarsamlingar, rådsmøte, landsmøte og på aktuelle konferansar arrangert av Nei til EU sentralt 
• Styremøta skal ha politisk kvarter som fast post på sakslista, og styremedlemmene skal veksla på å ha ansvar for å setja seg inn i og vidareformidla stoff om aktuelle tema. 
• Styret skal ha ein representant frå Ungdom mot EU i samsvar med vedtektene.
• Det skal vera minst 8 styremøte pr kalenderår 
• Det skal arbeidast aktivt for å få til eit meir aktivitets-orientert styre med bidrag frå alle, og for å gjera styreverv i Hordaland Nei til EU meir attraktivt for yngre folk. 
• Styret skal styrkja samarbeidet med lokallaga og lokalkontaktane ved å ta aktiv kontakt 
• Styret skal tilpassa all aktivitet innafor vedtekne budsjettrammer, og gjennomgang av den økonomiske stoda skal vera fast sak i styremøta
• Styret skal leggja til rette for eit aktivt og godt samarbeid med Ungdom mot EU, og støtta ungdomen i deira arbeid. 

Delta i auka samarbeid på tvers av alle fylkeslaga for inspirasjon, engasjement og erfaringsutveksling 

• Delta aktivt i fylkesnettverksmøta
• Vidareutvikla samarbeid på ulike område på tvers av fylkesgrensene og i heile landet
• Vurdera felles arrangement med fylke som ligg nær oss geografisk

Driva aktiv og kontinuerleg medlemspleie

• Halda fram med å kontakta alle nye medlemmer for å ønskja dei velkomne 
• Skriva fleire medlemsbrev med aktuelt politisk stoff samt informasjon om organisasjonen og om fylkesstyret sitt arbeid 
• Arbeida aktivt for at alle medlemene betalar kontingenten.