Regjeringa og olje- og energiminister Terje Søviknes nektar framleis å bruke Grunnlovsparagraf 115 som krev tre firedels fleirtal i Stortinget for å vedta Acer og den tredje energimarknadspakka til EU.
Nestleiar i Nei til EU, Olaf Gjedrem (KrF), reagerer sterkt på dette.
– Regjeringa reduserer paragraf 115 til ei «grad av suverenitetsavståing». Det er eit omgrep som er ukjent i paragrafen. Same juridiske nytale blei òg nytta i høve til Finanstilsynet. Denne nye praksisen undergrev og opphevar i røynda paragraf 115 og bagatelliserer maktoverføring bort frå norske politiske organ. Dette er særleg ille i ein situasjon der Nei til EU si kandidatundersøking synte at halve Stortinget sa dei ville stå sterkare opp mot EU og nytta reservasjonsretten.
I NRK Debatten 1. mars konstaterte Eivind Smith, professor i jus ved Universitetet i Oslo, med vantru at Lovavdelinga i Justisdepartementet medgir at det er «betydelige politiske og samfunnsmessige interesser involvert i denne saken», og likevel seier ein at dette «ikke er så viktig». Dette er inga god løysing for å skape politisk ro om ei sak, var bodskapen frå Smith.
Kristelig Folkeparti vil no at Stortinget ber Høgsterett om å vurdere kva energisamarbeidet vil tyde for Norge sin råderett over eigne naturressursar, slik Grunnlova § 83 gjev høve til.
Nei til EU stør dette framlegget fra KrF. Høgsterett må få uttale seg i ei sak der det rår stor usemje og tvil rundt juridiske og konstitusjonelle spørsmål som direkte vedkjem våre demokratiske prosesser og sjølvstendet til landet vårt. Det innebér sjølvsagt også utsatt sakshandsaming av den tredje energimarknadspakka.
Om Stortingsfleirtalet likevel avviser framlegget frå KrF, vil det sterkt svekke Stortinget sin legitimitet i denne og liknande saker. Difor vert det no sett i gong eit breitt initiativ i høve til Stortingsparti, fagrørsle, kommunar og organisasjonar for å vurdere eigen stemning av Stortinget for brot på Grunnlova. Nei til EU vil eventuelt vera del av eit slikt initiativ. Saman med våre partnarar vil vi konsultere den juridiske ekspertisen om framgangsmåten vidare og vil – om naudsynt – ta steg for å samle inn dei økonomiske midla som trengs for ein slik prosess.
For spørsmål eller kommentarar:
- Kathrine Kleveland | Leiar i Nei til EU | 928 25 162
- Olaf Gjedrem | Nestleiar i Nei til EU | 930 63 697
- Idar Helle | Nestleiar i Nei til EU | 986 76 403
